Maskatda Oʻzbekiston va Ummon madaniy aloqalariga bagʻishlangan xalqaro simpozium boʻldi

5 noyabr kuni Maskatdagi Sulton Qobusning Buyuk masjidida «Oʻzbekiston – Ummon: madaniy aloqalar» xalqaro simpoziumi boʻlib oʻtdi. U ikki mamlakatning ilmiy va maʼnaviy merosiga bagʻishlandi.

Ishtirokchilar qatorida Ummon din ishlari va vaqflar vaziri Muhammad bin Said Al-Mamari, akademik doira vakillari, jamoat arboblari, ekspertlar, diplomatlar va oʻzbek diasporasi bor edi. Tadbirni tayyorlash bilan Toshkentdagi Islom sivilizatsiyasi markazi, Oʻzbekiston Tashqi ishlar vazirligi va Oʻzbekiston elchixonasi shugʻullandi.

Uchrashuvda ikki davlatning tarixiy va madaniy aloqalari, umumiy maʼnaviy qadriyatlari hamda ularning islom sivilizatsiyasiga qoʻshgan hissasi haqida soʻz yuritildi. Mehmonlarga Islom sivilizatsiyasi markazi koʻrgazmasi namoyish etildi, Oʻzbekiston va Ummon olimlari esa ilmiy muhokamalar oʻtkazdi. Shuningdek, Ummonning madaniy-maʼrifiy muassasalari bilan hamkorlik memorandumlari tuzildi.

Islom sivilizatsiyasi markaziga rahbarlik qilayotgan Firdavs Abduxoliqov Ummon Milliy arxivlar va hujjatlar boshqarmasi raisi Hamad bin Muhammad Al-Dhuweyyani hamda Sulton Qobus nomidagi Oliy madaniyat va fan markazi rahbari Habib bin Muhammad Al-Riyamiy bilan alohida muzokaralar oʻtkazdi.

Ishtirokchilar Ummon Milliy muzeyi, «Bayt al-Zubayr» uy-muzeyi va «Ummon asrlar osha» muzeyiga tashrif buyurishdi.