Bishkekda Markaziy Osiyodagi qoʻshma sanoat loyihalari va qoʻshma investitsiyalar muhokama qilindi

5 noyabr kuni Qirgʻizistonning Bishkek shahrida Sanoatni rivojlantirish boʻyicha mintaqaviy forum boʻlib oʻtdi. Tadbirni Qirgʻiziston Iqtisodiyot va tijorat vazirligi hamda Birlashgan Millatlar Tashkilotining Sanoatni rivojlantirish tashkiloti (YUNIDO) oʻtkazdi.

Oʻzbekistonning sanoatni barqaror rivojlantirish borasidagi pozitsiyasini yalpi majlisda elchi Saidikram Niyozxoʻjayev bayon qildi. U mamlakatlar oʻrtasidagi savdodan yuqori qoʻshilgan qiymatga ega mahsulotlarni birgalikda ishlab chiqarishga oʻtish muhimligini taʼkidladi. Bunda saʼy-harakatlarni «olti iqtisodiyot — bitta mahsulot» formulasi asosida birlashtirish koʻzda tutiladi.

Takliflar qatoridan Sanoat kooperatsiyasi xaritasini tayyorlash, umumiy investitsiya tashabbuslarini moliyaviy va texnik jihatdan qoʻllab-quvvatlash platformasini ishga tushirish, shuningdek, «Turkiy dunyo — 100» dasturi doirasida 100 ta strategik loyihani amalga oshirish oʻrin oldi.

Ishtirokchilar Oʻzbekistonning Qirgʻiziston bilan hamkorligini ham alohida koʻrib chiqdilar. 2025 yilda mamlakatlar oʻrtasidagi savdo hajmi 1,2 milliard dollardan oshdi. Bundan tashqari, kelishuvlarda umumiy qiymati 540,6 million dollar boʻlgan 52 ta qoʻshma investitsiya loyihasi nazarda tutilgan.

Ustuvor yoʻnalishlar qatoriga avtomobil komponentlari va elektrotexnika mahsulotlarini ishlab chiqarish, paxta, jun va terini qayta ishlash, agrosanoat majmuasidagi hamkorlik, farmatsevtika hamda qurilish materiallari ishlab chiqarish kiritildi. Oʻzbekiston korxonalarni texnologik yangilash, xalqaro sifat standartlarini qoʻllash va mutaxassislar tayyorlash boʻyicha YUNIDO bilan hamkorlik qilishdan manfaatdor ekanini bildirdi.