Oʻzbekistonda bankomatlar ishlab chiqarilishi yoʻlga qoʻyilishi mumkin

Oʻtgan yili mamlakatda 9 mingta bankomat xarid qilinib, ular 50 mln dollardan ortiq mablagʻga import qilindi. Savdo-koʻngilochar majmualar va yangi turar joy massivlari soni koʻpayishi bilan bunday qurilmalarga ehtiyoj ham ortishi kutilmoqda.

Mahalliy ishlab chiqarishni yoʻlga qoʻyish imkoniyatini koʻrib chiqish uchun ichki bozor ehtiyojlarini hisoblash, zarur texnologiyalar va investorlarni jalb etish, shuningdek, bankomatlar ishlab chiqarishini tashkil etishning mavjud variantlarini oʻrganish topshirildi.

Elektr texnikasi sohasi vakillari, tadbirkorlar va investorlar bilan uchrashuvda ishlab chiqarishni rivojlantirishning boshqa yoʻnalishlari ham belgilandi. Toshkent viloyatida akkumulyatorlar va elektronika uchun yupqa mis folga, Jizzax viloyatida esa elektromobillar uchun invertorlar va quvvatlash qurilmalari ishlab chiqarish haqida soʻz bordi.

Namangan viloyatida suv nasoslari uchun energiya tejamkor elektr dvigatellarini ishlab chiqarish yoʻlga qoʻyilishi mumkin. Qoraqalpogʻistonda server uskunalari uchun uzluksiz elektr taʼminoti va sovitish tizimlarini ishlab chiqarish imkoniyati koʻrib chiqilmoqda.