Qozogʻistonda yoʻl yigʻimlari qayta koʻrib chiqiladi: oʻzgarishlar kimga taalluqli

Qozogʻistonda avtomobil yoʻllaridan foydalanish uchun toʻlov masalalari boʻyicha ishchi guruhning ilk yigʻilishida amaldagi yigʻimlar tizimiga kiritilishi mumkin boʻlgan oʻzgarishlar muhokama qilindi. Yigʻilishni Bosh vazir oʻrinbosari — milliy iqtisodiyot vaziri Serik Jumangarin oʻtkazdi.

Ishchi guruh tijoriy yuk transportining yoʻldan oʻtishi uchun toʻlov undirish yondashuvlarini koʻrib chiqdi. Gap Qozogʻistonlik va xorijiy tashuvchilar haqida bormoqda. Shu bilan birga, hukumat shaxsiy yengil avtomobillardan foydalanadigan fuqarolar uchun yoʻldan oʻtish shartlarini oʻzgartirishni taklif qilmayapti.

Ishtirokchilar yuk tashuvlarini nazorat qilish va yigʻimlarni toʻlash talablari bajarilishini ham muhokama qildi. Buning uchun raqamli vositalardan kengroq foydalanish, jumladan, yuk mashinalarining pulli yoʻl uchastkalaridagi harakatini kuzatish taklif etilmoqda.

Jumangarin davlat organlari, soha uyushmalari va biznes vakillari bilan birgalikda takliflar ustida ishlashni davom ettirishni topshirdi. Yangi yondashuvlarni tayyorlashda ishchi guruh tashuvchilar va tadbirkorlar manfaatlarini hisobga olishi, shuningdek, yoʻl infratuzilmasini saqlash xarajatlarini adolatli taqsimlashni taʼminlashi kerak.

Bazaviy takliflarni noyabr oxirigacha tayyorlash rejalashtirilmoqda. Shundan soʻng ular ishchi guruhning navbatdagi yigʻilishida koʻrib chiqish uchun taqdim etiladi.