Nothing ekranisiz sirli AI qurilmasini tayyorlamoqda — taqdimoti dekabrda kutilmoqda

Nothing rahbari Karl Pey X ijtimoiy tarmogʻida kompaniyaning sunʼiy intellekt bilan ishlash uchun boshidan yaratilgan ilk qurilmasi ustida ish olib borilayotganini maʼlum qildi. Uning soʻzlariga koʻra, yangilik kelasi oyda chiqadi, taqdimoti esa dekabrda kutilmoqda.

Pey gadjetning vazifasi va texnik xususiyatlarini ochiqlamadi. U faqat qurilma ekranga ega boʻlmasligi va oddiy ilova boʻlmasligini aytdi. U oʻz postida uni AI davri uchun yaratilgan, dizayn va individuallikka urgʻu beruvchi mahsulot deb atadi — Nothing bu jihatlarni oʻz qurilmalari bilan bogʻlaydi.

Xabarga Nothing logotipi va burchagi yumaloq, qisman koʻrsatilgan qora obyekt tasviri ilova qilingan. Bu qanday qurilma ekani hozircha nomaʼlum. Avvalroq Nothing sunʼiy intellektga ega aqlli koʻzoynaklarning ikki modelini chiqarishi mumkinligi, ulardan biri kameralarsiz boʻlishi ehtimoli haqida xabarlar paydo boʻlgan. Shuningdek, kompaniya sunʼiy intellektli aksessuarlarga eʼtibor qaratmoqchi ekani aytilgan.

Ekransiz AI gadjetlarini boshqa kompaniyalar ham chiqargan: bunday mahsulotlar qatorida Humane AI Pin broshi, Friend kuloni va aqlli yumshoq oʻyinchoqlar tilga olingan. Mavjud maʼlumotlarga koʻra, OpenAI dizayner Joni Ayv bilan birga AIʼli aqlli karnay ustida ham ishlamoqda. Peyning fikricha, sanoat AI qurilmalarining yangi ommaviy formatini izlamoqda, biroq u «AI dunyosidagi iPhone»ni yaratishga urinishlarni boshi berk yoʻnalish deb hisoblaydi.