Emomali Rahmon YI bilan Tojikiston energetikasi va sanoatiga sarmoyani muhokama qildi
Tojikiston prezidenti Emomali Rahmon va yevrokomissar Yozef Sikela YIning energetika, sanoat va boshqa loyihalarga sarmoyalarini muhokama qildi. Summalar va kelishuvlar oshkor etilmadi.
Tojikistonda 9 noyabr kuni Rahmon Yevropa Ittifoqining xalqaro hamkorlik boʻyicha komissari Yozef Sikela bilan uchrashdi. Tomonlar iqtisodiy aloqalarni kengaytirish, Yevropa kapitalini jalb qilish va qoʻshma loyihalarni muhokama qildi.
Muzokaralar markazida yashil energetika, iqlim oʻzgarishiga moslashish va iqtisodiyotning barqaror oʻsishi turdi. Uchrashuv ishtirokchilari, shuningdek, zamonaviy sanoat, raqamli texnologiyalar va ilgʻor uskunalar ishlab chiqarishni rivojlantirish masalalarini koʻrib chiqdi.
Tojikistonning mintaqaviy koridorlar va Yevropa bozorlariga transport aloqalariga alohida eʼtibor qaratildi. Hamkorlikning istiqbolli yoʻnalishlari sifatida geologik qidiruv, foydali qazilmalarni qazib olish va qayta ishlash, zamonaviy laboratoriyalar tashkil etish hamda mutaxassislar tayyorlash qayd etildi. Rahmon YI bilan hamkorlik mamlakat tashqi siyosatining ustuvor yoʻnalishlaridan biri boʻlib qolayotganini taʼkidladi.
Tomonlarning 2025 yil martidagi avvalgi uchrashuvi Global Gateway tashabbusi doirasida har biri €20 mln miqdoridagi ikkita grant boʻyicha kelishuvlar bilan yakunlangan. Yevropa tiklanish va taraqqiyot banki orqali beriladigan grant elektr tarmoqlarini modernizatsiya qilish, yoʻqotishlarni kamaytirish va infratuzilmani yangi qayta tiklanuvchi energiya manbalariga ulashga tayyorlashga moʻljallangan. GIZ orqali taqdim etiladigan ikkinchi grant barqaror paxta yetishtirish va uni qayta ishlashga yoʻnaltirilgan.
Yevrokomissiya maʼlumotlariga koʻra, 2021–2027 yillarda Tojikiston bilan hamkorlik uchun €142 mln koʻzda tutilgan. Qoʻllab-quvvatlash gidroenergetika, energiya samaradorligi, tarmoqlarni tiklash, Transkaspiy transport tarmogʻi va sunʼiy yoʻldosh aloqasi uchun yerusti infratuzilmasini yaratishni ham qamrab oladi.
