Anthropic 3,4 mlrd dollarga gaz turbinalarini sotib olmoqda
Financial Times xabariga koʻra, Anthropic Caterpillarʼdan 3,4 mlrd dollarga gaz generatorlarini sotib olmoqda. Ularning quvvati 1,7 GVt gacha yetishi mumkin.
Anthropic Caterpillar kompaniyasining gaz generatorlarini sotib olmoqda. Uskunalarni avval OnePWR buyurtma qilgan, biroq kompaniya xaridni yakunlash uchun moliyalashtirish topa olmagan. Shundan soʻng Anthropic bevosita ishlab chiqaruvchiga murojaat qilgan.
Bu xarid kompaniyaning avvalgi strategiyasidan farq qiladi. Anthropic odatda jismoniy infratuzilmani sotib olishdan koʻra, hisoblash quvvatlarini ijaraga olishni afzal koʻrgan. May oyida oshkor qilingan S-1 hujjatlarida kompaniya SpaceXʼning shoʻba korxonasi xAIʼga uning hisoblash resurslaridan 2029-yil mayigacha foydalanish uchun oyiga 1,25 mlrd dollar toʻlayotganini bildirgan. Anthropic shuningdek, shunga oʻxshash qoʻshimcha shartnomalar tuzishni rejalashtirayotganini aytgan.
Maʼlumotlarni qayta ishlash markazlari uchun energetika infratuzilmasi bozorida gaz turbinalarini yetkazib berish muddatlari 2030-yillarning boshigacha choʻzilgan. Elektr tarmoqlariga ulanish navbatlari ham shunga yaqin boʻlishi mumkin. Shu sababli sunʼiy intellektni rivojlantirayotgan kompaniyalar oʻz elektr ishlab chiqarish quvvatlarini tobora koʻproq koʻrib chiqmoqda.
Google, Amazon, Microsoft va Meta maʼlumotlarni qayta ishlash markazlari yaqinida yirik gaz elektr stansiyalarini qurish rejalarini eʼlon qilgan. Talabning oʻsishi gidravlik qatlamni yorish usuli bilan gaz qazib olishni ragʻbatlantirdi. Biroq gazga qaramlik yirik texnologik kompaniyalarni narxlar tebranishiga zaif qoldiradi: tahlilchilardan birining bahosiga koʻra, ayrim bozorlarda narxlar oʻn yillik oxirigacha uch baravardan koʻproq oshishi mumkin.
