Qozogʻiston YAIMi oʻn oyda 4,5 foizga oʻsdi
2026 yilning yanvar–oktabr oylarida Qozogʻistonning real YAIMi yillik hisobda 4,5 foizga oʻsdi. Toʻqqiz oy yakunlariga koʻra, oʻsish 4,2 foizni tashkil etgan edi. Asosiy hissani xomashyoga aloqador boʻlmagan tarmoqlar qoʻshdi.
Qozogʻiston Milliy iqtisodiyot vazirligi keltirgan Milliy statistika byurosining dastlabki maʼlumotlariga koʻra, xomashyoga aloqador boʻlmagan sektor 5,6 foizga, sanoat ishlab chiqarishi esa 3,5 foizga oʻsdi. Qayta ishlash sanoatidagi oʻsish toʻqqiz oy yakunidagi 8,6 foizdan oʻn oy yakunida 9,3 foizgacha tezlashdi.
Vazirlik tilga olgan tarmoqlar orasida eng yuqori oʻsish farmatsevtikada qayd etildi — 50,9 foiz. Tayyor metall buyumlar ishlab chiqarish 30,4 foizga, mashinasozlik 22,2 foizga, kimyo sanoati 21,9 foizga oʻsdi. Rezina va plastmassa buyumlar ishlab chiqarish 18,1 foizga, oziq-ovqat mahsulotlari ishlab chiqarish 13 foizga, qurilish materiallari ishlab chiqarish esa 5,4 foizga oshdi.
Qurilish hajmi 13,1 foizga oʻsdi. Transport va omborlash 7,5 foizga, savdo 6,2 foizga, qishloq xoʻjaligi 5,2 foizga, aloqa sohasi esa 4,9 foizga oʻsdi.
