Oʻzbekiston mobil telefonlar importiga nol boj stavkasini kelishib oldi
Oʻzbekiston Jahon savdo tashkilotiga aʼzo boʻlish boʻyicha muzokaralar doirasida mobil telefonlar import bojini 5 foizdan nolga tushirishga kelishib oldi. Yangi stavka qachondan joriy etilishi hozircha maʼlum qilinmadi.
Bu haqda 11 noyabr kuni Bojxona qoʻmitasi boshqarma boshligʻi Farhod Olimjonov maʼlum qildi. Uning soʻzlariga koʻra, bojni mamlakat Jahon savdo tashkilotiga qoʻshilishidan oldin bekor qilish rejalashtirilmoqda. Import chogʻida QQS undirilishi davom etadi.
Olimjonov budjet tushumlari 300–400 mlrd soʻmga kamayishi mumkinligini baholadi. Uning fikricha, telefonlar xaridorlar uchun qariyb 5 foizga arzonlashishi mumkin. Bojxona qoʻmitasi maʼlumotlariga koʻra, 2026 yilning yanvar–oktabr oylarida Oʻzbekistonga rasman 4,1 mln mobil qurilma olib kirilgan — bu oʻtgan yilning shu davridagidan 1 mln taga koʻp. Qurilmalarni olib kirish boʻyicha bojxona toʻlovlaridan tushum 2 trln soʻmga yetgan.
Hozir xorijdan telefon olib kirayotgan yoʻlovchilar IMEI raqamlarini keyinchalik roʻyxatdan oʻtkazish uchun qurilmalarni bojxona deklaratsiyasida koʻrsatadi. Toshkent aeroportida rasmiylashtirish qurilmalar identifikatorlarini tekshirish bilan bogʻliq tanaffusdan soʻng 11 noyabr kuni qayta tiklandi.
Noyabr boshida Jahon savdo tashkiloti Oʻzbekistonning tashkilotga aʼzo boʻlish boʻyicha muzokaralari muhim bosqichga chiqqanini maʼlum qildi. Tomonlar qolgan majburiyatlarni kelishib olishi va hujjatlarning yakuniy paketini tayyorlashi kerak.
