Anthropic qoʻllab-quvvatlanmaydigan hududlardagi kompaniyalar uchun Claude cheklovini kengaytiradi

Anthropic mahsulotlarning geografik mavjudligi qoidalarini yangiladi. Yangi cheklovlar 2026-yil 12-noyabrdan kuchga kiradi. Ular Claude, Claude Code, Cowork, API, shuningdek, bulut platformalari va rasmiy vositachilar orqali foydalanish mumkin boʻlgan modellarga taalluqli boʻladi.

Kirish imkoniyati faqat foydalanuvchining joylashuviga bogʻliq boʻlmaydi. Qoʻllab-quvvatlanmaydigan yurisdiksiyadagi kompaniya xodimi ruxsat etilgan mamlakatda boʻlsa ham, Claudeʼdan foydalana olmaydi. Cheklovlar bunday hududlarda roʻyxatdan oʻtgan yoki ularning rezidentlari ustun ulushga egalik qiladigan yoxud nazorat qiladigan tashkilotlarga ham tatbiq etiladi.

Aksincha, ruxsat etilgan kompaniyalar xodimlari qoʻllab-quvvatlanmaydigan mamlakatda, jumladan qisqa xizmat safari paytida, xizmatdan foydalana olmaydi.

Anthropicʼning rasmiy roʻyxatida 185 ta mamlakat va hudud bor. Roʻyxatga Iroq, Somali, Falastin va Tayvan kiradi, Rossiya, materik Xitoy, Gonkong va Makao esa kiritilmagan. Kompaniya bu roʻyxat AQSh sanksiyalari bilan bogʻliq cheklovlarga mos kelmasligini va oʻz mezonlari asosida tuzilishini taʼkidlaydi.

2025-yil sentabrida Anthropic qoʻllab-quvvatlanmaydigan yurisdiksiyalardan nazorat qilinadigan tashkilotlar uchun kirishni cheklashini eʼlon qilgan edi. Oʻshanda kompaniya bunday tashkilotlarning razvedka xizmatlari bilan ehtimoliy aloqalarini, milliy xavfsizlikka tahdidlarni va demokratik davlatlar manfaatlarini himoya qilish zaruratini sabab qilib koʻrsatgan.

Yangi tahrir siyosatning xodimlarga, mulkchilik tuzilmasiga va xorijdagi boʻlinmalar orqali ishlashga tatbiq etilishini aniqlashtiradi. Biroq Anthropic ruxsat etilgan hududlarni tanlash mezonlarini hamda korporativ nazoratni tekshirishning texnik usullarini toʻliq oshkor qilmadi.