OPEK: neft qazib olish Eron bilan urushdan oldingi darajalarga yaqinlashdi

Saudiya Arabistoni oktabrda kuniga 10,563 mln barrel neft qazib oldi — sentabrdagidan 2 mln barreldan koʻproqqa koʻp. Bu fevral oxirida Eron bilan urush boshlanganidan beri qayd etilgan eng yuqori koʻrsatkich boʻldi. Oʻshanda qazib olish hajmi kuniga 10,882 mln barrelni tashkil etgan.

OPEK+ning jami neft qazib olishi kuniga qariyb 2,04 mln barrelga oshib, 41,23 mln barrelga yetdi. Oktabrdagi hajm alyans fevralda qazib olgan kuniga 42,72 mln barrelning 97 foizini tashkil etdi. Koʻrsatkichning oʻsishiga, jumladan, AQSh prezidenti Donald Tramp Rossiya energetika sohasiga qarshi sanksiyalarni bekor qilgani va oktabrda Rossiya bilan Ukraina oʻrtasida “energetik sulh” eʼlon qilganidan keyin Rossiyada neft qazib olish hajmining ortgani ham sabab boʻldi.

Energiya strategiyasi boʻyicha mutaxassis Umud Shokri fikricha, taʼminotning koʻpayishi amerikalik isteʼmolchilarga tushayotgan inflyatsion bosimni yumshatishi mumkin. Biroq uning soʻzlariga koʻra, Saudiya Arabistonida neft qazib olishning oʻsishi yoqilgʻi quyish shoxobchalaridagi narxlar pasayishini oʻz-oʻzidan kafolatlamaydi.

Hisobotda aytilishicha, Fors koʻrfazi mamlakatlarining eksporti muqobil yoʻnalishlar, jumladan, neftni bir kemadan boshqasiga yuklash orqali qisman tiklanmoqda. Saudiya Arabistoni xomashyoni Hormuz boʻgʻozini chetlab oʻtgan holda Qizil dengizdagi Yanbu portiga yetkazish uchun Sharq—Gʻarb neft quvuridan foydalanadi. BAA ham Fudjayraga olib boruvchi quvur tufayli xuddi shunday ustunlikka ega.

OPEK jahon neftiga boʻlgan talab oʻsishi prognozini oʻzgartirmadi: kutilishicha, kelasi yili talab kuniga 2,55 mln barrelga oshib, oʻrtacha 108,3 mln barrelga yetadi. 2026 yil uchun talab oʻsishi prognozi kuniga 180 000 barrelni tashkil etadi. Tashkilot, shuningdek, Yaqin Sharq iqtisodiyoti 2027 yilda neftdan tashqari barqaror sektor va ichki talab hisobiga tiklanishini kutmoqda.