Eron COP31 sammitida hujumlar yetkazgan zarar uchun tovon talab qildi
Eron prezidenti Masud Pezeshkiyon COP31 sammitida AQSh va Isroildan harbiy zarbalar yetkazgan ekologik zarar uchun tovon puli talab qildi.
Turkiyaning Antaliya shahrida oʻtayotgan COP31 iqlim konferensiyasida Pezeshkiyon xalqaro hamjamiyatni Eronda va Gʻazo sektorida sodir etilgan hujumlar oqibatlarini qayd etishga chaqirdi. Shuningdek, u zararni qoplash mexanizmini yaratishni taklif qildi.
Prezidentning soʻzlariga koʻra, mart oyida Tehrondagi neft omborlari va Assaluye hududidagi gaz obyektlariga berilgan zarbalar natijasida 1,5 million tonna karbonat angidrid havoga chiqarilgan. Oʻshanda Isroil bu obyektlardan Eron armiyasini taʼminlash uchun foydalanilganini bildirgan.
Hujumlarning ekologik oqibatlari haqida avvalroq BMT ham tasdiq bergan. Yongʻinlar tufayli zaharli tutun aholi yashaydigan hududlarni qoplagan, tuproq va suv esa ifloslangan. Qeshm orolidagi chuchuklashtirish stansiyasi shikastlangach, 25 dan ortiq qishloq aholisi ichimlik suvisiz qolgan.
