ASEAN mamlakatlari 2027 yilda neft mahsulotlarini zaxiralashning yagona tizimini ishga tushiradi
Tizim doirasida Indoneziya va Tailandda saqlash omborlari tashkil etiladi
17 noyabr kuni Manilada Yaponiya bosh vaziri Sanae Takaichi ASEAN mamlakatlarining neft mahsulotlarini zaxiralash sohasidagi hamkorligi haqida eʼlon qilishi kutilmoqda. Tizimning oʻzi 2027 yilda ishga tushishi kerak.
Uning doirasida Indoneziya va Tailandda saqlash omborlari tashkil etiladi. Dastlabki bosqichda Filippinlar favqulodda vaziyatlarda ushbu mamlakatlardagi zaxiralardan dizel yoqilgʻisi va benzin sotib olishi mumkin boʻladi. Filippinning davlat neft kompaniyasi PNOC bilan bogʻliq kompaniyalar shanba kuni ombor operatorlari bilan niyat kelishuvlarini imzolashi kutilmoqda.
Mexanizm «biletlar» tizimi asosida ishlaydi. Ishtirokchi mamlakatlar yoki kompaniyalar favqulodda vaziyat yuzaga kelgan taqdirda boshqa mamlakat kompaniyalarida saqlanayotgan neft mahsulotlarining muayyan hajmini sotib olish huquqi uchun oldindan toʻlov qiladi. Shunga oʻxshash tizim Yevropa Ittifoqida amal qiladi.
Keyinchalik bu tizim xom neft zaxiralariga ham tatbiq etilishi mumkin. Tashabbusni ASEAN va Sharqiy Osiyo Iqtisodiy Tadqiqotlar Instituti ilgari surmoqda. Bu xalqaro tahlil markazi Yaponiya Iqtisodiyot, savdo va sanoat vazirligi tashabbusi bilan Indoneziyada tashkil etilgan.
Yaponiya hukumati loyihani Yaqin Sharqdagi urush sabab yuzaga kelgan taʼminotdagi uzilishlardan keyin mintaqaning energetik xavfsizligini mustahkamlash bilan bogʻlamoqda.
