«Yamal SPG»ning Yevropa Ittifoqiga oʻn oy ichidagi yetkazib berishlari qiymat jihatidan butun 2025 yil koʻrsatkichidan oshdi
2026 yil yanvaridan oktabrigacha Rossiyaning «Yamal SPG» loyihasidan Yevropa Ittifoqiga yetkazilgan suyultirilgan tabiiy gaz qiymati nemislarning Urgewald tashkiloti bahosiga koʻra €8,7 mlrdga yetdi. Bu 2025 yilning butun davridagidan taxminan 21 foiz koʻp.
Urgewald 2025 yil davomida amalga oshirilgan yetkazib berishlar qiymatini €7,2 mlrd deb baholadi. Tashkilot avvalgi hisobotida 2026 yil yanvar–sentabr oylarida Yevropa Ittifoqi portlariga Yamaldan 12,18 mln tonna SPG kelib tushgani, bu bir yil avvalgi shu davrga nisbatan 9,5 foiz koʻp ekanini maʼlum qilgan edi. Tahlilchilar ushbu partiyalar qiymatini €7,88 mlrd deb baholagan.
Energetika va toza havo tadqiqotlari markazi (CREA) maʼlumotlariga koʻra, oktabr oyida Rossiya SPG eksportining 47 foizi Yevropa Ittifoqiga toʻgʻri kelgan. Osiyodagi eng yirik xaridorlar qatorida Xitoy 26 foiz, Yaponiya 18 foiz va Janubiy Koreya 6 foiz ulushga ega boʻlgan. Shu oyda belgilangan manzil portlarida tushirilgan SPG partiyalaridan Rossiyaning hisob-kitob qilingan daromadi sentabrga nisbatan 3 foizga oshib, kuniga €77 mlnni tashkil etgan, garchi bu yetkazib berishlar hajmi 4 foizga qisqargan boʻlsa ham.
Avval tuzilgan qisqa muddatli shartnomalar boʻyicha Rossiya SPG yetkazib berishlariga taqiq 2026 yil 25 apreldan kuchga kirgan. Uzoq muddatli shartnomalar uchun oʻtish davri 2027 yil 1 yanvarda yakunlanadi. Rossiyadan quvur orqali yetkaziladigan gaz uchun Yevropa Ittifoqi kechroq muddatlar belgilangan alohida jadvalni nazarda tutgan.
