Quyosh va batareyalar uygʻun rivojlansa, Yevropada elektr toʻlovlari 40% kamayishi mumkin

12 noyabr kuni BMTning COP31 iqlim sammitida Schneider Electric instituti (SERI)ning quyosh energetikasi va energiya saqlash tizimlarining Yevropadagi elektr energiyasi qiymatiga taʼsiri haqidagi tadqiqoti taqdim etildi. Mualliflar generatsiya, batareyalar va elektr tarmoqlariga sarflanadigan xarajatlar turlicha boʻlgan 40 500 ta ssenariyni modellashtirdi.

Hisobotda taqsimlangan energetika resurslariga tomlarga oʻrnatilgan quyosh panellari, akkumulyator tizimlari, elektromobillar va “aqlli” maishiy texnika kiritilgan. SERI bahosiga koʻra, ularni elektrlashtirish bilan birga muvofiqlashtirib joriy etish texnologiyalar koʻlami kengaygani sari energetika tizimini ishlatishning umumiy qiymatini 40% gacha kamaytirishi mumkin. 2030 yilga kelib ehtimoliy iqtisodiy samara jahon yalpi ichki mahsulotining qoʻshimcha 0,8 foiziga baholanmoqda.

Tadqiqotda qayd etilishicha, batareyalar quyosh generatsiyasining ortiqcha hajmidan foydalanish va talab eng yuqori boʻlgan paytlarda tarmoqqa tushadigan yuklamani kamaytirish imkonini beradi. Aksincha, turli energetika aktivlaridagi energiya saqlash qurilmalarining ishlash davomiyligi muvofiqlashtirilmasa, tizim qiymati hozirgi moʻljaldan 35% gacha yuqori boʻlishi mumkin.

SERIning Yevropadagi operatsiyalar boʻyicha ijrochi vitse-prezidenti Loran Batai elektr energiyasi taklifini kengaytirish bilan bir vaqtda elektrlashtirilgan talabning oʻsishini tezlashtirish va isteʼmolni yanada moslashuvchan qilish kerak, deb hisoblaydi. Uning soʻzlariga koʻra, bu yuklamani tekislash va mavjud quvvatlardan samaraliroq foydalanishga yordam beradi.